O sol iustítiæ, quem immaculáta Virgo ut lucens auróra præcéssit,
—tríbue ut in lúmine visitatiónis tuæ semper ambulémus.

Verbum ætérnum, quod Maríam habitatiónis tuæ arcam incorruptíbilem elegísti,
—líbera nos a corruptióne peccáti.

Salvátor noster, qui iuxta crucem matrem tuam habuísti,
—præsta ut, ipsa intercedénte, communicántes tuis passiónibus gaudeámus.

Benigníssime Iesu, qui pendens in cruce, Maríam Ioánni matrem dedísti,
—da nobis ita vívere ut eius fílii agnoscámur.

Salvátor mundi, qui redemptiónis tuæ virtúte ab omni peccáti labe matrem tuam præservásti,
—serva nos mundos a peccáto.

Redémptor noster, qui Vírginem Maríam thálamum puríssimum habitatiónis tuæ et Spíritus Sancti fecísti sacrárium,
—nos templum tui Spíritus fac perénne.

Verbum ætérnum, quod matrem tuam docuísti óptimam sibi partem elígere,
—tríbue nobis eam imitári, cibum quæréntes, qui permáneat in vitam ætérnam.

Rex regum, qui matrem tuam córpore et ánima tecum voluísti in cælum assúmptam,
—fac ut quæ sursum sunt semper cogitémus.

Dómini cæli et terræ, qui Maríam regínam a dextris tuis astáre fecísti,
—tríbue nos eiúsdem glóriæ meréri consórtium.