Psalmodia
Ant. 1 Invéntus est sine mácula et perféctus est; erit illi glória ætérna.
Psalmus 14 (15)
Dómine, quis habitábit in tabernáculo tuo?*
Quis requiéscet in monte sancto tuo?
Qui ingréditur sine mácula et operátur iustítiam,*
qui lóquitur veritátem in corde suo,
qui non egit dolum in lingua sua,†
nec fecit próximo suo malum*
et oppróbrium non íntulit próximo suo.
Ad níhilum reputátus est in conspéctu eius
malígnus,*
timéntes autem Dóminum gloríficat.
Qui iurávit in detriméntum suum et non mutat,†
qui pecúniam suam non dedit ad usúram*
et múnera super innocéntem non accépit.
Qui facit hæc,*
non movébitur in ætérnum.
Ant. Invéntus est sine mácula et perféctus est; erit illi glória ætérna.
Ant. 2 Grátia Dei et misericórdia est in sanctos eius, et respéctus in eléctis illíus.
Psalmus 111 (112)
Beátus vir, qui timet Dóminum,*
in mandátis eius cupit nimis.
Potens in terra erit semen eius,*
generátio rectórum benedicétur.
Glória et divítiæ in domo eius,*
et iustítia eius manet in sæculum sæculi.
Exórtum est in ténebris lumen rectis,*
miséricors et miserátor et iustus.
Iucúndus homo, qui miserétur et cómmodat,†
dispónet res suas in iudício,*
quia in ætérnum non commovébitur.
In memória ætérna erit iustus,*
ab auditióne mala non timébit.
Parátum cor eius, sperans in Dómino,†
confirmátum est cor eius, non timébit,*
donec despíciat inimícos suos.
Distríbuit, dedit paupéribus;†
iustítia eius manet in sæculum sæculi,*
cornu eius exaltábitur in glória.
Peccátor vidébit et irascétur,†
déntibus suis fremet et tabéscet.*
Desidérium peccatórum períbit.
Ant. Grátia Dei et misericórdia est in sanctos eius, et respéctus in eléctis illíus.
Ant. 3 Cantábant sancti cánticum novum ante sedem Dei et Agni, et resonábat terra in voces illórum.
Canticum Ap 15, 3-4
Magna et mirabília ópera tua,*
Dómine Deus omnípotens;
iustæ et veræ viæ tuæ,*
Rex géntium!
Quis non timébit, Dómine,*
et glorificábit nomen tuum?
Quia solus Sanctus,†
quóniam omnes gentes vénient
et adorábunt in conspéctu tuo,*
quóniam iudícia tua manifestáta sunt.
Ant. Cantábant sancti cánticum novum ante sedem Dei et Agni, et resonábat terra in voces illórum.
