Psalmodia
Ant. 1 Virgo spléndida, prudens, clara consílio, sponsum ánimæ tuæ Verbum habes immaculátum.
Psalmus 18 (19) A
Cæli enárrant glóriam Dei,*
et ópera mánuum eius annúntiat firmaméntum.
Dies diéi erúctat verbum,*
et nox nocti índicat sciéntiam.
Non sunt loquélæ neque sermónes,*
quorum non intellegántur voces:
in omnem terram exívit sonus eórum*
et in fines orbis terræ verba eórum.
Soli pósuit tabernáculum in eis,†
et ipse tamquam sponsus procédens
de thálamo suo,*
exsultávit ut gigas ad curréndam viam.
A fínibus cælórum egréssio eius†
et occúrsus eius usque ad fines eórum,*
nec est, quod se abscóndat a calóre eius.
Ant. Virgo spléndida, prudens, clara consílio, sponsum ánimæ tuæ Verbum habes immaculátum.
Ant. 2 Regnum mundi et omne sæculum contémpsi propter amórem Dómini mei Iesu Christi.
Psalmus 44 (45)
I
Eructávit cor meum verbum bonum,†
dico ego ópera mea regi.*
Lingua mea cálamus scribæ velóciter scribéntis.
Speciósus forma es præ fíliis hóminum,†
diffúsa est grátia in lábiis tuis,*
proptérea benedíxit te Deus in ætérnum.
Accíngere gládio tuo super femur tuum,
potentíssime,*
magnificéntia tua et ornátu tuo.
Et ornátu tuo procéde, currum ascénde*
propter veritátem et mansuetúdinem et iustítiam.
Et dóceat te mirabília déxtera tua:†
sagíttæ tuæ acútæ
— pópuli sub te cadent —*
in corda inimicórum regis.
Sedes tua, Deus, in sæculum sæculi;*
sceptrum æquitátis sceptrum regni tui.
Dilexísti iustítiam et odísti iniquitátem,†
proptérea unxit te Deus, Deus tuus,*
óleo lætítiæ præ consórtibus tuis.
Myrrha et áloe et cásia ómnia vestiménta tua;*
e dómibus ebúrneis chordæ deléctant te.
Fíliæ regum in pretiósis tuis;*
ástitit regína a dextris tuis ornáta auro ex Ophir.
Ant. Regnum mundi et omne sæculum contémpsi propter amórem Dómini mei Iesu Christi.
Ant. 3 Concupívit Rex spéciem tuam, quia ipse est Dóminus Deus tuus.
II
Audi, fília, et vide,†
et inclína aurem tuam*
et oblivíscere pópulum tuum
et domum patris tui;
et concupíscet rex spéciem tuam.*
Quóniam ipse est dóminus tuus, et adóra eum.
Fília Tyri cum munéribus;*
vultum tuum deprecabúntur dívites plebis.
Gloriósa nimis fília regis intrínsecus,*
textúris áureis circumamícta.
In véstibus variegátis adducétur regi;*
vírgines post eam, próximæ eius, afferúntur tibi.
Afferúntur in lætítia et exsultatióne,*
adducúntur in domum regis.
Pro pátribus tuis erunt tibi fílii;*
constítues eos príncipes super omnem terram.
Memor ero nóminis tui*
in omni generatióne et generatióne;
proptérea pópuli confitebúntur tibi in ætérnum*
et in sæculum sæculi.
Ant. Concupívit Rex spéciem tuam, quia ipse est Dóminus Deus tuus.
